Strina 1^ classificata,cantata da IVAN MAZZOTTA
PONTICELLARIA
Ntra e Ponticelle arriva na ambasciata
e llu strinaru chi ne manda a dire :
scinditi ca la strina è ncuminciata
E’ ccu na viscigliata ncruce e nuce
quantu me mangiu due patate fritte
e nnu bicchieri e vinu ppè lla vuce
E mme ncavallu a sta cuda e sihune
chi sumadi huriusa du paise
e scinda dde castagne e “Donnuvune”
Me mbualicu a nna sciarpa e me ncappuattu
m’haju pigliatu a suarmu ppe lla manu
e nne mbiamu cu e timpe e Pizzuattu
Mbuttati cu due pampine e su mise
passi a Risana , ccu SantuVarianzu
Padosa, Parmaddama e llu Paise
Puartu l’aguriu da contrada mia
ccè ghjungiu e Jnustrette e lli Fravialli
bon Capudannu e bona Bihania
S’aggreghjanu a ssa vuce i Ruvettari
e Monache a Huresta e lle Mivogne
tutti a lla voca di Ponticellari
Signori bonasira a quantu siti
signiu venutu a vve cantare a strina
e ssi cc’è sbagliu me compatisciti
Ccù su arma pascalina era resciuta
aviadi de cantare assiami a mmia
e all’urtimu mumentu , s’è pentuta
Ve raccumandu de me ncuraggiare
ca signiu nu dcularu ppe stat strina
ancora hazzu a prima elementare
Ppe mamma e papu è stata na primiera
mirando Mutu e carmini Mazzotta
illa di Surdi e illu di Bandiera
Ppè quantu è veru ca signiu Ivanuzzu
i chiamu surdi ma la ntisa è bbona
e quando grida a sentano e Cucuzzu
Si u ssigniu prisentatu ccu lla strina
signiu u cugginu e Monica du barru
nepute a mastru Giukiu e l’officina
Papà fa l’operaiu a llu cantiari
e jettadi suduri e mavamorte
u stessu e comunali e cantuniari
Zu francu ca ia puru di Bandiera
de viarnu rota a ncu na spera e sule
d’estate ndu se vota la frischera
A cantu de cicale o a cantu e cuccu
lavuranu a prim’ura de matinu
de nove avanti rapanu u stiavuccu
Nui stamu a mmenza strata da muntagnia
ndu ne gudimu a pace da natura
e ll’armunia chi duna la campagna
Giuliu e Bandera avimu a llu vicinu
cchiù sutta Francu e Giuppu e Ginu e Cicca
ne sparta llu vallune e Matacinu
Nchucchiati cu carroccie de cerasi
umpuazzu nduminare a tutti quanti
ma nun me scuardu de zu Ciccu e Biasi
Liciattu de Cucuzzu scinda liantu
ne parra de l’antica santitate
ca e monache c’avianu nu cummiantu
De viarnu ccù jurilli a lla nivera
n’ammortiscimu avanti u huacuvaru
ma pue ne risbigliamu a primavera
Ia aspiattu chi m’abbussa a lla hinestra
e mme nde vaghju ngiru i terminali
ppè cogliere e violette a lla maestra
D’estate untiagniu tiampu e ghjre a mmare
me vaghju miatu ncuna manna e hianu
ca e pecorelle u viarnu hau dde mangiare
O vaghju cernulighju a lli spicuni
m’allighju na sazizza pedagnova
ppè vastuniare a capu a lli cursuni
E piacure e Attanasiu a llu sc-cavune
supra na mpara d’erba mercurella
ccè meranu cu pulluli e cuttune
Arricchii a lla cantata e Catarina
e vaghju scarminighju u gallinaru
ca illa l’ova i fa senza diosiina
Barune chiama e vvò servutu mparu
se ncugniadi de ghiande e dde castagne
ma minde pagu a lla lune e jennaru
Si a lle prime acque u ssu d’esciuti
postighju ntra cunocchie e bulicare
ranzani , capennivuri e nezzuti
Ccù lli vavusi ummicce abbuschju e spise
è un c’è bisuagniu e ghjre a lla muntagnia
ca tantu cind’hau tanti a llu paise
Mo u praticiallu nuastru è nu vesparu
e quando ccci hanu hattu u tirassegniu
Guglielmu , Sirviu e Giuappu e Mulinaru
Stau secutandu tutte e razze e aggalli
cuarvi curnocchie ,stuarni e carcarazzi
c’u mmi cce vassau fave e cucuzialli
M’accuargiu ca pigliatu du cantare
signiu abbusatu da pacianza vostra
Èe ura ca ncuminciu a salutare
A llu strinare chi m’ha fattu a hera
m’avia purmisu e d’è statu e parova
nu grazzie de Ivanuzzu de Bandiera
Ed aguru a sta strina vachitana
de curre sempre e undissiccare mai
cumu a sorgiva de Scanga vajana
Sperando ca l’esame aju passatu
mintiti bbuani voti a lla pagella
ca riastu ppè n’atr’annu ncuraggiatu
Si u mme pigliati ccù campane e vrunzu
me chiamu a Gianni Brigliu da Mantia
ppè ffa u discu ccu z’Achillu e Trunzu
Me resta suvu n’atra cortesia
de salutare u Triscinu e lli Margicc’è nata mamma e puru a strina
