A STRINA DE BADANTI
( Luchino Politano )
Sta lacrima ca stringiu ntra sta manu
mue n’atra vota cangiadi sapure
sta ppè pigliare chillu vachitanu
E jurnu, sempre giradi ccù mmia
e me la puartu a spassu cu na higlia
e notte, m’accumpagnia mmianzu a via
N’accuntentamu e chillu chi truvamu
chine ha bisuagniu nun pu avì pretese
e a fare ogni ccosa n’arrangiamu
E si sta vita è troppu disgraziata
inchìmu sti paisi e vui vassati
però “Addè passare sta nuttata”
Venimu dalle parti di Balcani
Vui emigrati e nui ndò vui trasimu
simu cchiù disgraziati e vui Taliani
Amu vassatu l’ amanti e lli mariti
e ncuna de nui, le cchiù fortunate,
su sistemata ccà,, ccu nuavi ziti
Nun c’è bisuagniu propiu d’esse sperte
ma, si si bella , certu vali e cchiudi
e truavi tutte quante e porte aperte
Cc’è chine chi te tena ccu nà higlia
e mbase all’affettu chi le damu
ne hadi sente , una de hamiglia
Ppe fa i lavuri nun te duna fretta
te mpara nduve ia llu portahogliu
te mbitadi ccù d’illa alla buffetta
Cc’è chine ca te tratta cu na serva
ppè d’ogni cosa ,se sent’arrubbate
e ammuccianu la pasta e lla conserva
E diciaunu “A patrona signiu ia
e tende mandu quando a mmia me piacia
ca uncehiarri a chist’ungnia mia “
Cc’è n’atru chi allonga troppu a manu
però va cumpatitu ca ia sulu
ullù pigliati ppe troppu villanu
Ncu a vota ne spusamu ccu ncu viacchiu
ppe ne piglià a pensione dopu muartu
però in vita, u massimu rispiattu
Ncunu ne chiama dame e compagnia
e quando escimu ne cunsamu belle
mbraccettu ccu l’anziani mmianzu a via
E nore, diciau ca unfacimu nente
però li culi li stujamu nui
e noni ille ca le su parente
I higli, embece, ne vuanu cchiu bene
e sanu i sacrifici chi hacimu
quando de notte ne spartimu e pene
A stu paise ne simu ntegrate
spiccamu ncu a parova vachitana
e de la gente simu rispettate
Avimu higli chi vanu alla scova
e cca s’abbarazzau ccu lli higli vuastri
ccu la speranza, e na speranza nova
Dàmune a manu e ghjamu tutti avanti
“sei noi vvoi dorìm un bun an nou”viva lu Lagu e viva le badanti
