FESTIVAL DELLA STRINA 2011
A REGINA DA HAMIGLIA
(Luca Politano)
Aguri , bonasira e mue cantamu
dopu li misi stati a llu letargo
cumu li gliri, nui ne risbigliamu
ne risbigliamu de stu suannu eternu
ch’è la ricchizza de li guvernanti
sempre aiutati da lu Patreternu
Nun c’jadi Capudannu senza strina
nun c’ja vighjlia senza baccalà
nun c’jadi pastasciutta ccù pastina
c’è lu Prisepiu , ma nun c’ja Natale
ca i preschjari sun guerra fra de illi
e llu Bumbinu nun vuadi cchiù arrivare
e un bò venire cchiù supra sta terra
ca se sunu allurdate le zimarre
e i priaviti fra loru sunu nguerra
A s’annu nuavu chiadu tante cose
ma primu e tuttu a mprofumare a vita
ccù na lavanda e gigli, oppuru e rose
e dassi, pue ,na bbona sciacquatina
a lla lurdìa du core e a llu ciarviallu
disinfettandoli ccù criolina
ca ccu ste corchie nivure a lle rase
se stanno perrupandu le famiglie
e sende stau d’inchiandu tutte e case
Stamu perdiandu u siansu e lla misura
si primu a novità era tri ghjurni
mue, dura solamente na menz’ura
e uncìa cchiù postu ppè llu dispiacire
nessunu hattu fa scrizzare i carni
c’è puru lu spettaculu a murire
Na vota ppè llu hine settimana
se ghjadi a Roma a vidare lu Papa,
mue vanu tutti quanti ad’Avetrana
c’è diventatu nu pellegrinaggiu
ma embece da Madonna o n’atru Santu
se vada a d’onorare nu garaggiu
Nessunu se hacissi meraviglia
è sa casciotta, ca n’ha cangiatu a vita
e d’illa la regina da famiglia
si primu se mangiava e se parrava
e a mamma dicìa all’atri “v’è piaciuta”
u patre ccu llu higliu ce jucava
mue la hamiglia è sempre cchiù a llu sbandu
nessunu chi se guardadi ccu l’atru
e tutti vuanu lu telecumandu
E cchi sapure c’hadi la pastina
mentre te guardi lu telegiornale
e vidi u scannamiantu da vicina
o dopu mentre mangi la nzalata
te mostranu lu zingaru pezziatu
o a guagliunella appena violentata
e nui cu tanti minchja ,llà ncantati
gudimu e ammazzatine e rapimenti
e diventamu tutti avvocati
e cce hurmamu puru u tribunale
chine grida ddè cchiù tena raggiune
“Ia signiu u miagliu e tu, nun sidi uguale!”
Forse ne cumbenissidi a pensare
e a nne guardà ntrà l’uacchi ppè capire
ca chissà limite, nun se pua superare
Purtamu a vita a lli valori veri
diciandu ca lu bene se conquista
ccù lli suduri e ccù lli hatti seri
ca senza stiantu campare hossi bbellu
ma chissa è roba de televisioneanzi è roba de “Grande Fratellu”
